Тони Белју тврди дека само еден тешкаш може да го симне од тронот Александар Усик

Александар Усик моментално е апсолутен шампион во тешка категорија. Откако пред неколку години ги победи сите противници во полутешка категоријата, тој го стори истото и во кралската дивизија.

Непоразениот украински борец минатата година ги обедини светските шампионски појаси во тешка категорија кога кон средината на јуни го победи Тајсон Фјури.

Тој стана првиот апсолутен шампион во ерата на четири појаси, а потоа се откажа од титулата на ИБФ за да организира реванш против „Џипси Кинг“, во кој исто така беше поуспешен.

Олимпискиот медалист од 2012 година од Лондон ги обедини титулите оваа година во јули на Вембли кога го победи шампионот на ИБФ Даниел Дубоа со нокаут во петтата рунда.

Најдобриот светски борец во тешка категорија и еден од најголемите борчи од неговата генерација се опоравува од повреда на грбот и посочи дека би сакал да има барем уште една борба пред да се повлече.

Усик досега ги победи сите противници, а освен Фјури, ги победи Даниел Дубоа и Ентони Џошуа двапати.

Поранешниот светски шампион во полутешка категорија и сегашен боксерски коментатор Тони Белју е полн со пофалби за Усик, но верува дека постои еден борец кој може да го запре големиот Украинец.

„Се надевам дека Усик ќе си замине со крената глава, не би сакал времето да го надмине. Сите ми се смееја кога реков дека ќе го победи Фјури, не еднаш, туку двапати. Тој е на различно ниво од останатите“, рече Тони Белју, додавајќи:

„Постои еден борец кој би можел да му предизвика проблеми, но знам дека сè уште не е подготвен за тоа – тоа е Мозес Итаума. Тој е единствениот боксер на кого му верувам. Но, не можете да го ставите во борба со Усик кога не поминал шест рунди, тоа би било неправедно кон човекот. Неговиот промотор брилијантно го води низ неговата кариера досега и прави одлични потези.

Непоразениот Мозес ги доби сите 13 натпревари, а во 11 од нив постигна победа со запирање во првите две рунди.

Во последниот меч, за само две минути, го победи поранешниот предизвикувач за светската титула Дилиен Вајт.

Итаума не сака елиминациски меч во ИБФ против Кубанецот Френк Санчез, а Мајкл Хантер и Дејвид Аделеј се споменуваат како потенцијални противници.

Промотерот Френк Ворен објави дека младата британска ѕвезда ќе се врати на рингот на 13 декември во Манчестер.