Чарли Ворд, поранешен борец на УФЦ и долгогодишен близок соработник на Конор Мек Грегор, се соочува со сериозни обвиненија за корупција во Ирска, објавија локалните медиуми, вклучувајќи го и „Роскоммон Хералд“. Според судските документи, Ворд (44) и сообвинетиот Ноел Керол (57) се обвинети дека се обиделе да поткупат член на ирските полициски сили (Гарда) со цел да добијат доверливи информации за трето лице.
Наводниот инцидент се случил на 2 март 2022 година, а Ворд е обвинет и за сличен обид два дена претходно, на 28 февруари. Керол е обвинет и дека се обидел да го стори истото на 26 јануари истата година. Двајцата обвинети моментално се ослободени со кауција, а во петкот, кога се појавиле во Окружниот суд во Даблин, не се изјасниле за виновни.
Ворд е обвинет и за „помагање, поттикнување или олеснување на извршување на кривично дело“, што имплицира поширок опсег на неговата улога во наводниот корупциски синџир.
Иако има професионален ММА скор од 10 победи и 7 порази, Ворд е познат на пошироката јавност по неговото пријателство и соработка со Конор Мек Грегор, за кого работел и како телохранител. Двапати се појави во УФЦ, но без победа, додека во Белатор забележа 7 победи и 4 порази. Неговата последна професионална борба беше во септември 2023 година.
Судењето продолжува, а исходот би можел да има значајни последици, не само за угледот на Ворд, туку и за луѓето со кои бил професионално поврзан, вклучувајќи го и најпознатиот ирски борец.
