Усик: Победив и тоа е сè што е важно, оваа победа им ја посветувам на сите мајки

Украинецот Александар Усик, кој ги бранеше појасите на Светската боксерска асоцијација (ВБА), Светскиот боксерски совет (ВБЦ) и Светската боксерска организација (ВБО) со победа со едногласна одлука, рече дека тоа е сè што е важно.

Усик (37), кој има 23 победи во 23 мечеви во професионалниот ринг, рече дека не му е грижа што одлучуваат судиите покрај рингот сè додека победата е негова. Сите тројца судии дадоа резултат 116-112 во корист на Усик, иако борбата изгледаше многу порамноправна.

Во мај, кога беше првата пресметка меѓу Усик и Фјури, победата повторно беше на Украинецот, но со 2-1. Во тоа време, впечатокот во јавноста беше дека тој извојувал многу порешителна победа.

„Победив и тоа е сè што е важно. Мојата сопруга ми даде многу сила и мислам дека бев поподготвен за овој меч“, беа првите зборови на шампионот.

„Денес е многу среќен ден за мене. Моите два сина добија портокалови и зелени џудо појаси. За жал, не можев да бидам со нив, но кога ги слушнав на телефон ми рекоа „Тато, ти си на ред“. Тоа ми даде уште поголема сила“, додаде тој.

Усик го посвети својот успех на својата мајка Надежда.

„Оваа победа сакам да и ја посветам на мајка ми. Секогаш е многу загрижена за мене да не ми се случи нешто. Оваа победа е за неа и за сите други мајки ширум светот кои се грижат на ист начин“, изјави Украинецот.

Во исто време, неговиот противник Тајсон Фјури брзо го напушти рингот. Промоторот Френк Ворен зборуваше во име на Британецот, кој рече дека не може да верува оти судиите дале само четири рунди во корист на неговиот боксер. Тој додаде дека нема поим како ќе продолжи кариерата на Џипси Кинг, кој веќе има биланс од 34 победи, едно реми и два порази.

116-112
116-112
116-112

AND STILL…. Oleksandr Usyk defeats Tyson Fury in the rematch 🇺🇦#Usyk2Fury | BUY NOW on TNT Sports Box Office ▶️ https://t.co/FXWiFF98Ej pic.twitter.com/p4A8TdUKiv

— Boxing on TNT Sports (@boxingontnt) December 21, 2024

Додека Ворен зборуваше во рингот, Усик извади меч од 17 век. Оружјето што гордо го држеше над главата го поседуваше хетманот на Казакското хетманство, Иван Мазепа. Мечот е донесен во Саудиска Арабија специјално за натпреварот од музеј во Украина.