Владан Панев изминатиов викенд стана европски шампион во бразилско џиу џицу. Панев, кој по потекло е од Свети Николе, настапува за Австрија, бидејќи таму е роден и таму го совладал овој спорт.
Панев на Европско џиу џицу превнство во Рим, Италија, го освои златниот медал во БЏЏ во дисциплината но-ги (без кимоно) мастерс 1, виолетови појаси во супертешка категорија.
Панев извојува победи против Јасин Момахед, Андреа Лукези и во финалето над Калум Мекки.
„Немам зборови, тоа беше најубав момент во мојот живот“, вели Панев по освојувањето на златниот медал.
Владан за Ипон.мк истакнува дека имал три борби и три победи за златниот медал, наведувајќи дека во категоријата над 100 килограми имало седум натпреварувачи.
„Првата борба ја добив со завршница (американа), втора на поени, а во финалето победив со армбар за 20 секунди. Ниту еден поен не беше направен против мене на Европското првенство“, нагласува Панев.
Колку време се занимаваш со џиу џицу?
– Боречки вештини тренирам од 6 години во Клостернојбург (место блиску до Виена), каде што сум роден. Мојот клуб е Алфа академи, каде што тренирам сега.
Почнав со кик бокс и џудо. Сега имам кафеав појас во џудо, а во џиу џицу виолетов.
Какви резултати постигна?
– Имам многу победи на турнири во граплинг и џиу џицу. Вкупно околу 40 борби.
Дали настапуваш и во други спортови?
– Настапувам и во ММА. Шампион сум на Австрија во ММА.
Колку време настапуваш за Австрија?
Во Австрија сум роден. За жал, настапувам за нив, а не за Македонија!
