Тајсон Фјури нема да биде притиснат за конкретни рокови за конечната одлука за неговата иднина. Ова го соопшти шефот на ВБЦ, Маурицио Сулејман. Првично, му даде рок на Британецот до минатата недела да ја разјасни својата желба да направи меч за обединување за сите појаси, а со тоа и да ја одбрани титулата. Сепак, сега излезе дека има пресврт во неговата позиција.
Причината веројатно лежи во тоа што ако сега „Џипси Кинг“ биде притиснат да каже „да“ или „не“, речиси сигурно одговорот ќе биде не и Фјури всушност ќе се повлече од професионалниот ринг. Потсетуваме, Тајсон по победата над Дилиен Вајт најави дека ова му е последен меч. Потоа се појавија различни шпекулации за обединувачкиот меч на Британцот со победникот од мечот Александар Усик – Ентони Џошуа.
„Ќе му дадеме време колку што му треба. Не сакам да шпекулирам. Разговаравме, но тоа ќе го направиме во блиска иднина. Подобро да почекам и да му дадам простор да се одмори, отколку да го притиснам и да добијам одговор што не сакаме да го слушнеме“, рече Сулејман.
Доколку Тајсон потврди дека се пензионира, можеби ќе има турнир на кој ќе се одреди новиот шампион. Во првите пет по Фјури се Дионтеј Вајлдер, Џо Џојс, Џозеф Паркер, Френк Санчез и Енди Руиз.
