Според љубителите на борењето Боречкиот клуб Вардар, како најсимпатичен и најомилен меѓу публиката, со своите атрактивни млади борачи подготвено настапува на боречките арени.
Интересно е тоа што овој викенд вардарци ќе настапат на три мегдани, Државното првенство во У-20 во Радовиш. Под водство на потпретседателот Далибор Милановски и тренерите Штерјо Митров и Гордан Николов борачите ќе се потрудат да освојат висок пласман во своите категории или како што вели потпретседателот Далибор: „Одиме на победа“!
На Меѓународниот серуски турнир „Бајкал опен” во Буратија, Руска Република, во категоријата до 86 кг Македонија ќе ја претставува македонскиот шампион во У-23 Адам Модосјан.
„Очекуваме добри новости и од Русија“, вели Милановски.
На Европското првенство во Братислава, Словачка, за сениори, двајца борачи на Вардар и еден тренер ќе се потрудат да освојат одличја за Македонија, до 79 кг ќе настапи Ахмад Магомедов и до 97 кг Магомедгаџи Нуров, предводени од тренерот Љубиша Пешко.
„Според квалитетот и подготвеноста, нашите борачи би требало на Европското првенство да освојат два медали. А ништо нема да биде чудно и доколку останатите членови на репрезентацијата се најдат на пиедесталот, ги имам во предвид Бесир Алили до 61 кг и Фати Вејсели до 70 кг“, соопшти Пешко.
