Тајсон Фјури (34-1-1) изгледа сигурен дека реваншот со Александар Усик (22-0) ќе му биде полесен од првата средба, бидејќи нема да си го дозволи истото потценување. Сепак, Украинецот се потсмеваше на барањата од Британецот.
„О Боже, нема шанси! Следниот меч нема да биде лесен. За мене мечот ќе биде тежок бидејќи Тајсон Фјури е големо момче, добар боксер со добар боксерски коефициент на интелигенција. Но, ако Тајсон мисли дека неговиот меч ќе биде лесен, нека биде така. Тајсон, не плаши се. Доаѓам по тебе и нема да те оставам на мира“, изјави Усик за Скај спорт.
Потсетуваме дека првиот меч пролетва подобро започна за „Џипси Кинг“. Ја наоѓаше далечината и ги пласираше подобрите удари. Во вториот дел, пак, Александар сериозно го подигна темпото и почна подобро да го скратува растојанието. Во 9-тата рунда имаше дури и нокдаун, кој можеше да биде нокаут, да не беше гонгот. Судиите на крајот му дадоа глас на Усик со 2-1, со што ни го дадоа првиот неприкосновен светски шампион во тешка категорија во последните две децении.
Реваншот меѓу нив е закажан за 21 декември во Ријад.
