Илија Топурија (15-0) продолжува да биде еден од ретките кои не сакаат да го пречекаат Конор Мек Грегор (22-6) назад во кафезот на УФЦ, а Шпанецот овој пат повторно сериозно го нападна Ирецот поради неговото однесување надвор од спортот.
„Ако ми понудат борба со него, ќе одбијам бидејќи веќе има други поголеми предизвици наоколу. Тој не е Мек Грегор кој ги воодушеви масите. Тој е Мек Грегор кој повеќе ги застапува алкохолот и дрогата отколку спортот“, изјави Матадорот за Марка.
„Ноториус“ секојдневно се појавува со контроверзи во јавниот простор. Еден ден го промовира своето виски и пиво во егзотичен дел од светот, друг ден објавува клипови од него како јава додека разни жени му ги опслужуваат физичките потреби, друг ден се појавува покрај ринг на најголемите настани во светот на боречките вештини и на четвртиот упатува уште едно барање да се врати во октагонот.
Топурија, се чини дека е целосно посветен на кариерата. Тој за еден месец треба да ја предводи галата на УФЦ во Абу Даби во одбрана на титулата во перо категорија против Макс Холовеј (26-7), а претходно имаше можност да се бори на стадионот „Сантијаго Бернабеу“ во реваншот против Александар Волкановски.
