Поранешниот шампион на ВБЦ Тајсон Фјури во средината на мај ја загуби титулата во мечот за апсолутен светски шампион против Александар Усик.
Непоразениот украински боксер со поделена одлука го победи Кралот на Ромите и ги обедини титулите во тешка категорија за прв пат по 25 години.
Двата најдобри светски тешкаши се подготвуваат за реваншот кој ќе се одржи на 21 декември во Саудиска Арабија.
А во едно неодамнешно интервју, Фјури повторно зборуваше за пензионирањето, но овој пат не толку претерано како што сме навикнати од него.
„Во боксот долго време сум заљубен уште од детството, а сега имам 34 години. Мислам дека мојата кариера е при крај и тоа би можело да се случи во следните неколку години“, изјави Тајсон Фјури, додавајќи:
„Односот меѓу мене и боксот е полн со љубов и омраза. Кога е добро, навистина е добро, а кога е лошо, многу е токсично. Отсекогаш сум бил во таа романтична врска, уште од дете и сега кога имам свое семејство. Да се остави или не? Многу пати сакав да се откажам од боксот, но тој постојано ме влечеше назад“.
Кралот на Ромите, освен што добро боксира, тој е и одличен забавувач. Можеби понекогаш претерува, но луѓето го сакаат, а тоа го докажува неговата армија обожаватели ширум светот.
Публиката му дава посебна енергија, а тој сака да им го приреди најдоброто шоу што некогаш ќе го видат во рингот. Секогаш сака да биде најдобар во ова и не бега од фактот дека е голем зависник од бокс.
„Боксот е како дрога и јас сум зависен од него. Боксот не ми е најдобар пријател, ме злоупотребува. Кога доаѓам во сала, тоа ми го мачи телото, умот и душата, но после тоа ме доведува до екстаза“, признава Тајсон Фјури и истакнува:
„Но тој наплив на чувства е неверојатен. Боксот ми дава највисоки издигнувања, но знае и да ме спушти на најниско ниво. Боксот предизвикува поголема зависност од која било дрога во светот. Кога сте зависни од тоа, не е лесно да престанете“.
