Александар Усик заслужено се смета за најдобар боксер во неговата ера, ако не и на сите времиња.
Поради сето она што го постигна, вклучително и освојувањето на титулата борец на годината од магазинот Ринг за 2024 година, многумина веруваат дека сега може да ја заврши кариерата со крената глава, со обезбедено место во Куќата на славните.
Овој украински левучар е непоразен во досегашната кариера. Има 23 професионални борби откако помина во професионалци од аматерскиот бокс по освојувањето на златниот медал на Олимписките игри во Лондон во 2012 година.
Оттогаш „исчисти“ цели две категории. Прво стана апсолутен шампион во полутешка категорија, а потоа премина во тешка категорија и го повтори истиот успех. За време на две последователни борби со Ентони Џошуа, успеа да победи и потоа да одбрани три од четирите светски титули пред повторно да ги одбрани против Даниел Дубоа со прекин.
Потоа следеа уште две тешки пресметки со Тајсон Фјури, а повторно, како и против Џошуа, Усик излезе како победник во двата меча.
Како што стојат работите, има многу повици до него да се бори повторно со Дубоа за уште еднаш да стане апсолутен шампион, под услов Дубоа да го победи Џозеф Паркер на 22-ри февруари.
Во изјава за Дејли мејл, познатиот боксерски промотор Френк Ворен тврди дека Усик му го кажал токму тоа.
„Александар ми кажа минатиот викенд дека ќе се бори со победникот од мечот Даниел (Дубоа) против Џозеф Паркер за да се обиде повторно да стане апсолутен шампион во тешка категорија“.
Да се стане двократен апсолутен шампион во тешка категорија би бил уште еден историски подвиг за Усик. Сега сè што треба да направиме е да го чекаме 22-ри февруари кога ќе видиме еден од најдобрите боксерски настани преполни со врвни натпревари. Што се однесува до Усик, тој будно ќе го следи појасот на ИБФ што Дубоа ќе го стави заложи против Паркер.
