Британскиот боксер Ентони Џошуа извојува четири победи во последните 11 месеци, ги победи Џермејн Френклин, Роберт Хелениус, Ото Валин и неодамна Френсис Нгану.
Освојувачот на златниот медал на Олимпијадата во Лондон 2012 година повторно изгледа моќно и е подготвен за голема борба.
Но, најверојатно ќе го чека исходот од мечот за апсолутниот светски шампион во тешка категорија меѓу Тајсон Фјури и Александар Усик, кој ќе се одржи на 18 мај во Саудиска Арабија.
А во последните денови повторно се појави приказната за потенцијалниот меч меѓу Џошуа и Фјури, на кој љубителите на боксот со години се надеваа да се договорат.
Промоторот Френк Ворен изјави дека нивната борба би можела да се договори за една година, а поранешниот тренер на Џошуа, Ричи Вудхол, даде свое предвидување за натпреварот меѓу Еј Џеј и Фјури.
„Откако Бен Дејвисон го презеде тренинзите, Џошуа веќе неколку пати боксира многу добро. Нокаутот против Нгану беше одличен, беше навистина импресивно. Мислам дека сега сите сакаат да гледаат меч меѓу Фјури и Еј Џеј“, истакна Ричи Вудхол, а го прогнозираше и претстојниот дуел за апсолутен шампион:
„Фјури има тешка борба против Усик, но со него никогаш не се знае. Тајсон изгледа како да е во животна форма во моментов. Но, верувам дека Фјури ќе го добие тој меч, тој е преголем за Усик“.
Боксерскиот тренер се осврна и на потенцијалната борба меѓу Фјури и Џошуа.
„Ќе видиме како ќе изгледа Фјури во следната борба против Усик, ќе биде многу тешка борба за него и ќе мора да биде најдоброто од себе. А сега мислам дека коефициентот за Фјури и Џошуа во нивниот потенцијален меч е 50-50. Но, ако Фјури го победи Усик, тогаш тој ќе стане фаворит“, додаде Ричи Вудхол.
