Поранешниот двократен светски шампион Ентони Џошуа постигна четири победи во низа по неговиот втор пораз од Aлександар Усик.
Посебно убедлив беше последниот во март, кога со нокаут во втората рунда го победи поранешниот шампион на УФЦ Френсис Нгану.
А Британецот ќе го бара својот петти последователен триумф на 21 септември на Вембли кога ќе се бори со сонародникот Даниел Дубоа за титулата во тешка категорија на ИБФ.
Кој беше клучот за сегашната нокаут серија на Еј Џеј три од четири борби? Поранешниот тренер на Џошуа, Роберт Гарсија, истакнува дека овој успех може да се припише само на активност.
„Активноста, неговата посветеност и желбата повторно да стане шампион е она што го прави да изгледа толку добро“, рече Роберт Гарсија и додаде:
„Мислам дека Бен Дејвисон е дефинитивно одличен тренер и многу му помогна. Но, мислам дека најважно е што тој остана активен и преокупиран“.
Тој посочува дека Мечрум и неговиот менаџерски тим завршиле одлична работа.
„Не се сомневам дека повторно ќе стане шампион. А набргу потоа можеби ќе се бори за апсолутен светски шампион. Нека се обиде уште еднаш да дојде до тронот“, истакнува Роберт Гарсија, а не се сомнева во победата на Џошуа против Дубоа:
„Полн е со самодоверба по последните четири борби и верувам дека ќе има лесна борба. Џошуа ќе го победи Дубоа со нокаут“.
Доколку Џошуа по трет пат ја освои светската титула, најверојатно ќе се бори против победникот од мечот меѓу Усик и Фјури, кои на 21 декември боксираат во реваншот. Потенцијално ќе следи трилогија против Украинецот.
„Ако е доволно агресивен, мислам дека би можел да го победи Усик“, нагласи Роберт Гарсија.
