Швајцарскиот ММА борец Волкан Оездемир минатиот викенд го победи Бразилецот Џони Вокер со брутален нокаут во средината на првата рунда.
Поранешниот предизвикувач во полутешка категорија ги прозва поранешните шампиони Џамахал Хил и Јан Блахович по неговиот 20-ти триумф во кариерата и втор по ред.
„Зошто ги спомнав тие двајца? Затоа што сакам да напредувам на листата на предизвикувачи. Борбата против Блахович би била за кралот на Европа, одличен меч за европските навивачи. А сакам и дуел против Џамахал Хил. Целта ми е еден ден да победам во категоријата. Но, времето се врати. Дојде моето време и сакам да го покажам тоа“, рече Волкан Оездемир и продолжи:
„Блахович и Хил моментално се повредени, па не знам дали може да се договори борба. А сакам што е можно поскоро да се вратам на борбите, целта ми е Париз. Сакам повторно да се борам во Франција. Наскоро ќе се женам, па парите ќе ми бидат добредојдени“.
