Теренс Крафорд против Канело Алварез. Ќе се согласите, тешко дека може да биде подобро од тоа. Канело Алварез и понатаму е најголемата светска боксерска ѕвезда и апсолутен светски шампион во суперсредна категорија, а Теренс Крафорд моментално е најдобриот боксер во светот.
„Бад“ има статус на апсолутен светски шампион во две различни тежински категории, а освен него тоа им успеа само на Александар Усик и Наоја Инуе. Крафорд досега во кариерата имаше 40 меча и никој не успеа да го совлада, а сите овие успеси го прават водечки боксер на денешницата.
За жал, постои една голема пречка за договарање на овој меч. Канело Алварез е боксер во супер средна категорија (-76,2 кг), додека Крафорд последниот меч го водеше во полусредна категорија (66,6 кг). „Бад“ ќе дебитира во супер велтер категорија (69,8 кг) во следниот настап против Израел Мадримов, но тоа е сепак две категории под онаа во која се натпреварува Канело.
Мексиканецот претходно изјави дека не планира да ослабе и мечот против Крафорд е опција само доколку „Бад“ сака да се приклучи на неговата кариера. Ако се земе предвид дека некогаш боксираше во лесна категорија (-61,2 кг), скокот до суперсредна категорија би бил навистина значаен.
Има многу пореални шанси Крафорд во блиска иднина да се соочи со Џерон Енис (32-0, 1 НЦ), непоразениот светски шампион во полусредна категорија и боксер кој многумина го гледаат како наследник на Крафорд. Сепак, Крафорд ја отфрла таа идеја и го посакува Канело.
„Гледајќи каде се наоѓам во моментов, ја таргетирам борбата што има најмногу смисла, а тоа не е „Бутс“ (Енис). Канело носи многу повеќе за моето наследство, како и за мојата банкарска сметка. На крајот на денот, кога ќе престанам да боксирам, што ми останува? Сакам да имам наследство за кое ќе се зборува со години, но сакам да имам и банкарска сметка која ќе трае некое време. Мислам дека изборот на сите би бил Канело. Сите би требало да се согласиме, како и Турки Алалших, бидејќи тој е тој што ќе ги испорача парите. Многу работи се вклучени во договарањето на тој меч“, објасни „Бад“ во интервју за ММА час.
Позитивна работа е што Турки Алалших е вклучен во целата приказна. Саудиецот ни докажа дека има моќ да организира натпревари кои публиката најмногу ги посакува, а борбата меѓу Крафорд и Канело би била навистина историска боксерска борба. На потег се Турки и Канело.
