Актуелниот шампион во тешка категорија на УФЦ, Стипе Миочиќ ги сподели своите размислувања за претстојниот реванш со Френсис Нгану, кој ќе го предводи УФЦ 260 во Лас Вегас на 27 март.
„Френсис е супер тврдо момче. Ги нокаутираше сите во низа и има добра серија, но за жал ќе мора повторно да се бори со мене. Ова не е најдобрата опција за него. Тој дефинитивно се разви многу, но и јас не останав на едно место“.
Пред три години, Миочиќ успешно ја одбрани шампионската титула, со едногласна одлука го совлада Предаторот по пет рунди, а нема сомнеж дека овој пат резултатот ќе биде ист.
„Да, стареам, но имам неколку нови трикови во ракавот. Тие велат дека не можете да научите нови трикови на старо куче, но тоа е лага. Научив многу во последните неколку години, така што резултатот ќе биде ист. Ќе го напуштам октагонот со шампионскиот појас“, додаде шампионот.
Миочиќ ја истакна својата главна предност во претстојната битка.
„Време и брзина. Претежно брзина. Брзината убива и на тоа работевме во последните два тренинг кампа, подготвувајќи се за борбите против Кормиер“.
Доколку Миочиќ го помине Нгану, сите индиции покажуваат дека неговиот следен противник ќе биде поранешниот шампион на УФЦ во полутешка категорија Џон Џонс, кој важи за најдобар борец во историјата на УФЦ.
„Да, слушнав за тоа, но подготвен сум да се борам со секого. Во моментов сум фокусиран на задачата што претстои. Да се борам против Нгану е единственото нешто на што мислам“, заклучи Стипе.
