Џо Роган верува дека истекува времето за Конор Мек Грегор да се врати во УФЦ.
Најголемата ѕвезда во историјата на ММА не зачекорила во октагонот од 2021 година, кога двапати беше запрен од Дастин Пориер. Иако минатата година беше закажан меч против Мајкл Чендлер, борбата беше откажана поради повреда на прстот, а Ирецот оттогаш не прифати ниту еден нов датум.
Мек Грегор денес на 36 години е на крстопат. Според Роган, ако планира да се врати во сериозна конкуренција, сега е време – бидејќи секој дополнителен месец може да значи чекор подалеку од релевантноста на врвот на спортот.
„Имаше скршен прст на ногата пред борбата со Мајк Чендлер“, изјави Роган во својот поткаст. „Разбирам, зошто би се борел повреден? Особено затоа што Конор се потпира на движење, тоа е основата на неговиот стил. Значи, нека заздрави. Колку долго трае закрепнувањето? Два месеци? Така, се враќате во кампот, организирате борба и продолжувате понатаму. Но, тоа не се случи“.
Роган потоа продолжува кон она што тој верува дека е вистинската причина за неговата стагнација.
„Исто така, постојано журкање“, додаде тој. „Сите тие правни проблеми, крстарење со јахти, возење ламборџини. Тој е богат. Најтажно би било кога би се вратил на 39 или 40 години, а неговото тело едноставно не може повеќе да го издржи. Тоа е опасно“.
Мек Грегор неодамна во Ирска беше прогласен за граѓански одговорен за сексуален напад, а во текот на постапката призна дека консумирал кокаин – на што алудираше Роган.
„Кога ќе слушнете дека некој користи кокаин, тоа е најлошата вест“, рече Роган. „Тоа е она што најбрзо го јаде човекот, особено борецот. А проблемот со борците е што сите тие се зависници од адреналин. Кокаинот го обезбедува тоа лажно залетување, таа возбуда… И се чини дека Конор го сака тоа. Затоа сум речиси сигурен дека нема да се врати“.
На прашањето дали верува дека Мек Грегор повторно ќе зачекори во октагонот на УФЦ, Роган беше директен:
„Не, мислам дека нема да се врати“, рече тој. „Затоа што ако навистина сакаше да се врати, веќе ќе се вратеше. Би бил во сала, чист, тестиран, во камп, со резервирана борба. Тоа не се случи“.
Сепак, остава простор за друга можност, но со јасен услов:
„Ако планира да се врати, мора да биде сега. На 36 години.Сега или никогаш“.
