Кик бокс репрезентацијата на Македонија предводена од претседателот и селектор Дејан Митровски – Урко и тренерот Драган Атанасовски денеска имаа прием кај директорот на Агенцијата за млади и спорт, Дарко Каевски, по повод успешната организација на Европско првенство во кик бокс за кадети и јуниори во Скопје и големиот успех на македонските кик-боскери.
Каевски изјави дека Македонија уште еднаш се покажа како одличен домаќин и потврди дека секогаш е спремна за организација на вакви големи натпреваруња, а воедно им честита и за остварениот успех на младите кик боксери.
„Ми претставува чест што денес имам можност да ги примам младите репрезентативци кои направија високи резултати на последното Европско првенство во кик-бокс. Македонија секогаш давала големи имиња во кик-боксот, па и од оваа репрезентација очекувам да излезат идните сениорски репрезентативци кои ќе ја претставуваат Македонија и ќе и донесат високи одличја во иднина. Во однос на организацијата на Европското првенство, Македонија уште еднаш се покажа како одличен домаќин и потврди дека секогаш е спремна за организација на вакви големи натпреварувања. Сакам да им честитам и на Кик-боксинг Федерација на Македонија, која се покажа како одличен домаќин на ова првенство“, изјави Каевски.
Митровски упати благодарност до директорот и до Агенцијата за млади и спорт за огромната поддршка што ја даваат на Федерацијата, особено за одржувањето на ова големо меѓународно натпреварување и дополни дека Македонија се покажала како одличен домаќин, а во однос на резултатите репрезентативците биле на посакуваното ниво.
„Сакам да упатам голема благодарност до директорот и до АСМ за огромната поддршка што ни ја даваат, особено кога ни беше најпотребна за одржувањето на ова големо меѓународно натпреварување. Ние, како организатори, се покажавме како одлични домаќини и учесниците беа задоволни од нашето гостопримство. Во однос на македонската кик бокс репрезентација, ние со 10 медали во генерален пласман завршивме на 27-то место со 3 сребрени и 7 бронзени медали. Сребрени медали освоија Азрет Зекири, Стефан Крстев и Марко Тодоров, додека бронзите им припаднаа на Никола Нацев, Ивица Цветковски, Стојанов Благојче, Ненад Пантиќ, Бобан Јосифов, Витанов Витанче и Викторија Варадинова“, истакна Митровски и додаде дека следен голем настан кој ја очекува Федерацијата е Светското првенство за сениори 2017 во Будимпешта, Унгарија, од 3 до 12 декември.
Ipon.mk/В.Д.
