Сол Алварез и Дмитри Бивол немаа потешкотии на официјалното мерење пред нивната претстојна шампионска битка.
Мексиканецот и Русинот влегоа во полутешка категорија, надминувајќи ја последната пречка пред нивната долгоочекувана средба. Мечот ќе се одржи во Лас Вегас во недела во раните часови (по македонско време).
Неприкосновениот шампион во суперсредна категорија ќе се соочи со непоразениот шампион на ВБА во категоријата до 79 килограми.
31-годишниот северноамериканец тежеше 79,1 килограми, додека 31-годишниот Бивол 79,2 килограми.
Канело ќе се бори по втор пат во оваа дивизија. Своето деби го имаше на крајот на 2019 година кога го нокаутира Сергеј Ковалев во нивната битка за титулата на ВБО. Алварез не се борел од ноември кога го совлада Калеб Плант.
Бивол е во серија од 8 последователни одбрани на шампионскиот појас, последен пат го победи сонародникот Умар Саламов во декември 2021 година.
