Поранешниот шампион во велтер категорија Камару Усман е подготвен да се врати во октагонот и да докаже дека сè уште припаѓа на врвот. Тој ќе се соочи со ѕвездата во подем Хоакин Бакли во главната борба на УФЦ Фајт најт 257 во Стејт арм арена во Атланта, Џорџија, на 14 јуни.
Усман (20-4) не се борел од октомври 2023 година, кога прифати покана во последен момент од Хамзат Чимаев во средна категорија и загуби со едногласна одлука, што е негов трет последователен пораз во кариерата. Оттогаш, Нигериецот се фокусираше на закрепнување и физичка рехабилитација.
„Знаеш како велат, Хенри. Велат дека ќе го направам ова, ќе го направам она. Но, доста со зборување“, рече Усман во поткастот „Паунд 4 паунд“ со Хенри Сехудо. „Морав да направам пауза – како што реков претходно. Но, се враќам од таа пауза. Добро ме слушна, Хенри – твоето момче се врати“!
Хоакин Бакли (21-6) е во одлична форма откако се врати во велтер категорија, добивајќи четири од шесте борби со нокаут, вклучувајќи импресивен технички нокаут над Колби Ковингтон во декември во главната борба на УФЦ на ЕСПН 63.
„Очекуваме одлична борба“, рече Усман. „Бакли е агресивен, силен, атлетски граден – тоа е предизвикот што го сакам. Понекогаш едноставно мора да го испуштите тој борбен дух. Јас сум еден од оние борци кои вложуваат многу труд во тренинг, а понекогаш едноставно сакате да ја почувствувате борбата“.
„Имав борби каде што излегов од кафезот без гребнатинка и адреналинот сè уште ми е висок. Се надевам дека е подготвен, дека си ја завршил домашната задача, бидејќи ако сè оди добро, ќе биде неверојатна борба“.
