Настанот КСВ 105 во сабота во Гливице, Полска, ќе се одржи една од најочекуваните борби во 2025 година – судир меѓу двајца поранешни носители на титулата „Најсилен човек во светот“, Еди Хол и Мариуш Пуџијановски. А судејќи според зборовите на главниот раководител на КСВ, Мартин Левандовски, влоговите би можеле да бидат уште поголеми во иднина.
Левандовски откри за ММ А фајтинг дека постои отвореност за потенцијална соработка со ПФЛ и организирање мегаборба меѓу победникот од саботната пресметка против поранешниот шампион во тешка категорија на УФЦ, Франсис Нгану.
„Во контакт сум со луѓе од ПФЛ. Дефинитивно можеме да разговараме за таков меч ако се подготвени да го споделат борецот. Дефинитивно има интерес од моја страна“, рече Левандовски.
Ова ќе биде официјалното MMA деби на Хол, па правилата на борбата се прилагодени – наместо стандардните три рунди од по пет минути, борбата ќе се води во две рунди од по четири минути. Исто така, одморот меѓу рундите ќе трае 90 секунди наместо вообичаената една минута.
Левандовски откри дека му била потребна речиси една година за да се организира оваа борба.
„Се обидувам да ја организирам оваа борба речиси една година. Го замолив Мариуш да ме поврзе со Хол бидејќи двајцата беа светски шампиони во натпреварите во сила. Хол на почетокот ме одби, штотуку му се роди дете и имаше други обврски. Го планиравме за КСВ 100, но не успеа. Сега, конечно, на 26 април, ќе ги видиме заедно во кафезот“, објасни Левандовски.
Иако ова е негова прва официјална ММА борба, Хол веќе е под договор за две борби во КСВ.
„Тој моментално има договор за две борби, а разговараме и за потенцијална долгорочна соработка. Но, сè зависи од исходот на борбата во сабота. Засега можам да кажам дека Еди пристапува кон сè многу сериозно“, додаде Левандовски, истакнувајќи дека Хол се подготвувал со привремениот шампион во тешка категорија на УФЦ, Том Аспинал.
Ова ќе биде 27-ми професионален настап на Пуџијановски во ММА, и тој се стреми да го врати победничкиот моментум по два последователни порази. Хол, од друга страна, има само едно неофицијално појавување во борба 2 на 1.
