Во последните месеци Ивандер Холифилд во своите објави на социјалните мрежи покажа одлична форма со оглед на неговата возраст. Легендата на боксот има 58 години, но сепак е полн со енергија. Поранешниот светски шампион тргна по патот на Мајк Тајсон и реши да се врати во рингот.
Егзебициската пресметка меѓу Холифилд и Ајрон Мајк се споменува веќе некое време, но очигледно тој меч во моментов не е планиран.
Но, Ивандер веќе нема намера да чека и договори борба против Кевин Мек Брајд кој последен го победи Мајк Тајсон во 2005 година.
Егзебицискиот меч меѓу Ивандер Холифилд (44-10-2, 1НЦ) и Кевин Мек Брајд (35-10, 1 НЦ) ќе се одржи на 5 јуни во Мајами на настан предводен од светскиот шампион во лесна категорија Теофимо Лопез и Џорџ Камбозос.
Последниот професионален меч Холифилд го имаше во 2011 година кога го совлада Брајан Нилсен со технички нокаут.
