Деновиве Собранието на Македонија ги усвои измените на Законот за спорт со кои се регулира наградата на клупските тренери чии спортистите ќе освојат медали на светски и европски првенства.
Со новиот закон клупскиот тренер ќе добие награда од 40 проценти од наградата што треба да ја прими спортистот за една година, а селекторот ќе добива 20% од наградата на клупскиот тренер.
Досега беше обратно.
Нов член од Законот за спорт за утврдување на награди за селектори и тренери
Член 44
На стручните лица кои ги подготвуваат спортистите (тренери во клубовите) им следува еднократна награда од 40 отсто од вкупните средства што му следуваат на категоризираниот спортист за една година. Доколку во остварувањето на врвниот спортски резултат на спортистот од став 1 на овој член учествувале повеќе стручни лица како стручен тим, наградата предвидена за едно лице се дели на учесниците кои партиципирале во работата на стручниот тим, согласно со општиот акт на Националната спортска федерација.
На стручното лице со чија стручна работа спортистот остварил врвен спортски резултат со кој ја стекнал категоријата спортист од светска категорија и спортист од меѓународна категорија му следува 20% од сумата утврдена во ставот 1 на овој член. На стручните лица од ставовите 1 и 3 на овој член, кои на едно исто спортско натпреварување оствариле резултат со кој повеќе спортисти ја стекнале категоријата спортист од светска или спортист од меѓународна категорија, им следува само една еднократна награда.
Предлог за награда на стручно или стручните лица, кои учествувале во остварување на спортскиот резултат на категоризираниот спортист, дава Националната спортска федерација, при доставување на предлог на листата за категоризација на спортистите, во предвидениот рок од член 48 став 1 на овој закон.
Органот на државната управа надлежен за работите од областа на спортот при објавувањето на листата на категоризирани спортисти во „Службен весник на Република Македонија” ја објавува и листата на нивните стручни лица – тренери кои учествувале во работата за остварување на спортскиот резултат.
Ќе потсетиме дека многу тренери во поединечните спортови досегашната рапределба ја оценуваа неправедна, бидејќи некои за неколку дена селектор го собираа маслото. Тренерите укажуваа дека тие работат цела година со спортистите и бараа оваа пракса да се промени.,
