Поранешниот шампион во две категории на УФЦ, Хенри Сехудо, го повика Макс Холовеј да ги преиспита плановите да премине во лесна категорија и наместо тоа да остане во перо категорија за да продолжи со четвртата борба против неговиот стар ривал Александар Волкановски.
Холовеј веќе три пати загуби од Австралиецот со македонско потекло – во 2019, 2020 и 2022 година – но според Сехудо, сега е вистинско време за реванш.
„Мислам дека Холовеј е подобро заштитен, има посилна брада, така што овојпат нема да биде исто“, изјави Сехудо за ММА џанки. „Волкановски имаше добра борба против Диего Лопез, но беше многу забележливо што го чувствуваше секој удар што го доби. Неговата реакција на ударите беше дури и претерана. Сега разбирам зошто Илија Топурија го нокаутира“.
Волкановски неодамна си ја врати титулата во перо категорија со победата над Диего Лопез, но според Сехудо, има знаци на пад во неговиот учинок.
„Да, тој прави многу работи многу добро, но прави и многу грешки – особено во дефанзивата“, анализира Сехудо. „Постојано се брани со наведнување наназад, правејќи финти без да ги користи рацете. Ако Лопез почесто фрлаше крошеа, резултатот можеше да биде поинаков“.
