Британскиот шампион во тешка категорија Дерек Чисора (41) планира да се пензионира по следната борба која ќе биде 50-та во неговата кариера. Двајцата водечки британски промотери Френк Ворен и Еди Херн сакаат да соработуваат за да организираат голема проштална борба за боксерот.
„Тој сака да се пензионира по голема борба“, рече Ворен за Чисора во интервју за Скај спорт. „Разговарав со Еди Херн денеска и во догледно време ќе ги споделиме нашите планови со јавноста. И двајцата бевме вклучени во неговата кариера. Започна со мене и долго работевме заедно, а јас ги организирав и неговите последни борби“.
„Сакаме да ја направиме оваа негова 50-та борба. Сакам да направам нешто со Еди Херн за да го испратам“, додаде Ворен.
Во февруари оваа година, Чисора победи против Ото Валин, што му овозможи да го заземе второто место на рангирањето на ИБФ во тешка категорија. Првото место во тоа рангирање е празно и Ворен вели дека Чисора е задолжителен предизвикувач на шампионот на ИБФ, Даниел Дубоа, кој исто така го претставува Ворен.
„Чисора е задолжителен предизвикувач. Тој ја доби таа позиција во претходната борба – сите знаат колкав беше влогот во таа борба. Тоа е задолжителна победи за нашиот човек „Опасниот Дан“ (Даниел Дубоа). Тоа е позицијата на која се наоѓа сега“, рече Ворен.
