Непоразениот хрватски тешкаш Филип Хрговиќ многу брзо си ја заврши работата на боксерскиот спектакл во Ријад.
На Хрговиќ му беа потребни само 106 секунди да го принуди својот противник од Австралија, Марк де Мори да се предаде.
Ел Анимал така стигна до својата 17-та професионална победа со која ја одбрани позицијата прв предизвикувач во борбата за титулата шампион на ИБФ.
А тој меч може да се случи следната година, откако шампионот на ВБЦ, Тајсон Фјури и Александар Усик, кој ги има титулите на ВБА, ВБО, ИБФ и ИБО, ќе се борат за апсолутен шампион во тешка категорија.
Тие треба да се соочат на 17 февруари, а доколку се согласат на реванш, ИБФ најави дека ќе му го одземе појасот на победникот.
Хрговиќ тогаш би имал свое место во борбата за светската титула додека неговиот противник би се барал на ранг-листата на ИБФ.
А прв под Хрговиќ сега е Ентони Џошуа, кој го победи Ото Валин со прекин по петтата рунда на истиот настан во Саудиска Арабија.
Пред настанот на големо се зборуваше за меѓусебен судир на Џошуа и Вајлдер, кој по слабиот настап и пораз од Џозеф Паркер веројатно испадна од комбинациите за следен противник на Еј Џеј, а тоа го потврди и промоторот Еди Херн.
„Ентони Џошуа се врати. Неговиот тренер и тимот веќе ми го соопштија тоа. Тие рекоа дека тој уништува момци во спаринг и удира многу силно. Верувам дека овој Ентони Џошуа е најдобриот на светот. Тоа беше совршен настап. Валин е феноменален тешкаш, а Џошуа го уништи. Го скрши носот, го скрши телото, страшна изведба. Со оваа состојба на умот и овој тим, мислам дека Џошуа е непобедлив“, истакна Еди Херн и го откри планот на Еј Џеј и она што сите сакавме да го слушнеме:
„Имавме тешка одлука меѓу борбата за титулата и натпреварот против Вајлдер. Ние потпишавме со Вајлдер оваа недела откако тој загуби. Можеби тоа е благослов, бидејќи Џошуа е борец за титула. Ќе се одржи борбата меѓу Хрговиќ и Џошуа за светската титула. Тој сака да дојде на тронот по трет пат. Ова е Џошуа со насмевка, кој ужива, а тоа е најопасно. Следната година ќе биде негова и сите тешкаши треба да бидат на прсти“.
