Поранешниот светски шампион во тешка категорија Ентони Џошуа би требало да се врати на тренинзите за осум недели по мистериозната повреда.
Последниот настап на Џошуа беше во септември минатата година кога загуби од шампионот на ИБФ Даниел Дубоа со нокаут во петтата рунда на преполниот Вембли.
Тој отворено кажа дека има желба што поскоро да се врати на подготовките и да ја договори долгоочекуваната битка за Британија против Тајсон Фјури.
Но, по неговиот втор пораз против Aлександар Усик во декември, десет дена подоцна Кралот на Ромите објави дека се пензионира. Оттогаш тој не изговорил ниту еден збор на оваа тема.
Долгогодишниот промотер на Џошуа, Еди Херн, уште еднаш повтори дека Еј Џеј во моментов има две борби во преден план, можен меч против Џипси Кинг и реванш со Дубоа.
Херн додава дека 35-годишниот Ентони се уште не може да се врати на целосните тренинзи поради повредата, но откако ќе заздрави би можел да боксира некаде во септември.
„Џошуа е повреден и има болки во горната половина од телото. Ништо посебно, но не може да тренира со максимална сила. Ќе му треба малку време за да биде подготвен да се врати во тренинг кампот“, изјави Еди Херн и подвлече:
„Му требаат уште осум недели да се опорави, а потоа претпоставувам дека би можел да погоди како што треба. Кампот би го започнал во април или мај, а мечот би можел да му се договори на крајот на летото“.
Џошуа беше во победничка серија од четири борби по неговиот втор пораз од Усик во август 2022 година, а потоа дојде тој тежок пораз против Дубоа.
