Четири години надвор од кафезот, четири години полни со скандали и правни битки. Конор Мек Грегор постојано зборува за камбек, но малкумина се уште му веруваат. А меѓу неверниците можеме да го вклучиме и Џо Роган, кој смета дека боречката кариера на Ирецот дефинитивно е завршена. За Мек Грегор јасно кажа: „Неговиот брод веќе отплови“.
Поминаа четири долги години откако Мек Грегор последен пат зачекори во октагонот на УФЦ. Тогаш неговата трилогија со Дастин Пориер се претвори во кошмар. Страшна скршеница на ногата, крај на борбата и долга пауза. Имаше многу шпекулации, но враќање во кафезот немаше. Шефот на УФЦ, Дана Вајт, неколку пати изјави дека е неизвесно кога и дали Конор ќе се врати.
И колку подолго поранешниот шампион е надвор од игра, толку потешко ќе биде неговото враќање. Мек Грегор летово ќе наполни 37 години. Може ли некој да го замисли на врвот на УФЦ? Додека фановите сè уште се надеваат дека ќе го видат омилениот борец назад во кафезот, Џо Роган ја отфрли таа идеја. Според него, кариерата на Мек Грегор дефинитивно е завршена.
„Би сакале да се врати, но за жал не изгледа така. Сите добро знаат дека неговиот брод веќе отплови и дека неговата кариера е завршена. Навистина не знам дали некогаш повторно ќе се бори.
Не ги знам деталите за неговиот случај, но знам дека овој човек живее за забава и дека навистина му е тешко. Неговиот живот повеќе не е живот на професионален борец“, рече Роган на неговиот поткаст Џо Роган експириенс.
