Светскиот шампион во тешка категорија на ИБФ Даниел Дубоа е подготвен за летна пресметка во мечот за обединување на титулата против Александар Усик. Борбата би можела да биде договорена за јули на Вембли.
Дубоа (22-2, 21 КО) не е во акција од минатогодишната победа во септември со нокаут во петтата рунда над Ентони Џошуа.
Тој требаше да го брани шампионскиот појас во февруари против Џозеф Паркер, но поради болест го откажа настапот два дена пред настанот во Ријад.
Британецот е во врвна форма и се надева на реванш против непоразениот Украинец. И Усик (23-0, 14 КО), кој ги има титулите во ВБЦ, ВБА и ВБО, исто така сака да се обиде уште еднаш да ги обедини појасите во тешка категорија.
Менаџерот на Усик Александар Красјук потврди дека неговиот тим е во преговори за реванш со Дубоа, преговорите се во тек.
„Мечот дефинитивно би можел да се договори за јули. Голема борба во јули против Усик. Ова е она што го сакам“, рече Даниел Дубоа и додаде:
„Нашите тимови разговараат, преговорите се водат зад сцената. Но, јас сум борец и подготвен сум наскоро повторно да влезам во рингот, тоа е моја работа. Се подготвувам и го чекам повикот, не е важно кој ќе биде следниот противник. Подготвен сум да му ги отворам портите на пеколот“.
Сепак, Даниел се надева дека следен противник ќе му биде Украинецот.
„Натпревар против Усик на Вембли би бил како дуел со Еј Џеј, но многу поголем. Тоа би била најголемата борба на светот. Тоа е борба која навистина ме возбудува, а која ми нуди можност за одмазда“, истакна британскиот борец и продолжи:
„Тоа би била борба за апсолутен шампион, а со големи букви би заминала во историјата. Тоа би бил огромен историски настан. Исто како и мечот против Еј Џеј. Можам да замислам колку би било гужва на Лестер Сквер. Би било неверојатно да се биде дел од ваква борба. А јас ќе бидам тој што ќе го спречи. Ќе бидам првиот што ќе го победи. Вестите за борбата доаѓаат наскоро“.
Дубоа не ја исклучи можноста негов следен противник да биде Џозеф Паркер или Дерек Чисора, кој ја чека 50-тата и последна борба во кариерата пред да се повлече.
„Не сум баш заинтересиран да се борам со Чисора, но секако, зошто да не? Знаете, мене повеќе ме интересираат противниците како Паркер, Усик и Еј Џеј, тие момци имаат врвни имиња“, рече Даниел Дубоа и подвлече:
„И јас имам незавршена работа со Паркер. Ќе мора да го сторам тоа и да го тргнам од патот за да замолчам некои луѓе. Но, ако сега добијам шанса да се борам со Усик, тогаш тој меч ќе мора да почека“.
