Дионтеј Вајлдер синоќа имаше катастрофален настап. „Бронзениот бомбардер“ на настанот во Саудиска Арабија дојде со статус на поранешен светски шампион, но и со епитетот најголема ѕвезда на целиот настан. Сепак, тоа не го спаси на мечот против Џозеф Паркер, бидејќи Новозеландецот со корени од Самоа го декласира во меч од 12 рунди.
Впечаток е дека Паркер беше подобар во секоја од тие 12 рунди, а еден од судиите дури го бодуваше мечот со 120-108. Разбираме дека по мечот борците сакаат да креваат раце и да создаваат впечаток дека се чувствуваат победнички за да влијаат на севкупниот впечаток. Се уште е нејасно зошто Вајлдер крена раце по толку слаб настап, а набрзо по мечот „Бронзениот бомбардер“ понуди објаснување.
„Да, имав чувство дека заслужив да победам, но мојот тајминг сепак не беше добар на овој натпревар. По заслуга на Џозеф, тој заврши одлична работа и ги избегна моите најтешки удари. Вечерва нема да барам изговори, тоа беше добар меч и сега ќе продолжам понатаму”, изјави Вајлдер и ако навистина верува дека заслужил да победи, веројатно е единствениот во светот со такво мислење. .
Но, што тргна наопаку, зошто Вајлдер даде толку слаб настап? Многумина како причина за поразот ја посочуваат долгата неактивност, бидејќи Вајлдер е надвор од рингот повеќе од една година. Последниот меч до тоа синоќа Вајлдер го одржа во октомври од минатата година, а потоа веќе во првата рунда го совлада Роберт Хелениус.
„Можно е неактивноста да играла улога, но нема да се задржуваме на тоа. Дојдовме овде да завршиме работа и се свртуваме кон следните предизвици. Со нетрпение очекувам да одам дома да ги видам моите деца“, истакна Дионтеј, а потоа накратко се осврна на стратегијата за натпреварот против Паркер.
„Сакав да останам максимално смирен, да го фрлам предниот дел директно и да ја прилагодам десницата. Тајмингот беше исклучен, а тој направи добра работа да ги избегне моите удари. Ајде да продолжиме“.
Во текот на целата „Борбена недела“, од ден на ден слушавме и читавме за потенцијален меч помеѓу Дионтеј Вајлдер. Се споменуваше дури и датумот (9 март), а според Еди Херн, натпреварот е договорен и договорите се потпишани. Секако, условот беше Џошуа и Вајлдер да забележат победи на своите мечеви синоќа, но Џозеф Паркер му ги расипа плановите на Вајлдер. Дионтеј призна дека можеби требало повеќе да се фокусира на Паркер.
„Можеби сето тоа со Џошуа малку ми го одвлекуваше вниманието. Многу се зборуваше за разни работи, но нема да барам изговори. Уживав што бев тука и ви благодарам што дојдовте да ме поддржите. Дефинитивно ќе се вратам“, изјави американскиот тешкаш.
Неколку пати Вајлдер нагласи дека ќе се врати, но кога започна поконкретен разговор за продолжување на кариерата, Вајлдер беше прилично двосмислен. Во еден момент изјавува дека сигурно ќе се врати, а следната секунда истакнува дека мечот против Паркер може да му биде последен.
„Ќе видам што ќе се случи. Направив одлична работа кога станува збор за раководење со пари. Јас сум среќен борец. Јас сум воин и наскоро ќе се вратам. Ако не се вратам, ми беше задоволство. Не знам дали сеуште ја имам истата ревност, многу работи ме смирија, најдов мир во мојот живот. Цела недела имам насмевка на лицето и ќе продолжам да ја имам. Ништо нема да ме спречи да го направам тоа. Тоа е навистина за што се работи, да се биде воин и да се даде се од себе. Ако работите не одат како што сакате, станувате и продолжувате да се обидувате. Ова е смислата на вашиот живот, не смеете да се откажувате и мора да продолжите. Сите ние имаме нешто во нас да бидеме големи, но големината ја одредува нашето служење. Ќе продолжам со своето служење“, изјави двосмислениот Вајлдер.
Има 38 години, одамна е финансиски обезбеден, а беше и „вжештена глава“ по 12 рунди со Паркер. Не можеме да му замериме што е неодлучен, но факт е дека никој нема да се изненади доколку Вајлдер во периодот што следи објави крај на кариерата.
